الصياعة ادب مش هز إزاز

حد يعرف تفاصيل معاناة اسلاميين تركيا خلال قرن تقريبا من بعد انقلاب اتاتورك على السلطان عبد الحميد لما اتاتورك فرض نظام عالماني متطرف وشن حرب شعواء على الاسلام وعلى المؤمنين بالحل الاسلامي

تعرفو كام انتخابات نجح فيها الاسلاميين في تركيا بالاستحواذ على الاغلبية البرلمانية 

تعرفو كام مرة شكلو وزارة بحكم انهم اغلبية 

تعرفو عدد المرات اللي انقلب فيها العسكر الصهاينة في تركيا على الاسلاميين وكام مرة حلو برلماناتهم وكام مرة حولوهم للمحاكم بتهم ملفقة 

تعرفو عدد الاسلاميين في تركيا اللي اتعدموا وعدد اللي اتسجنوا لسنوات طويلة وعدد اللي اتمنعو من ممارسة العمل السياسي

لو تعرفو تفاصيل معاناة الاسلام السياسي في تركيا هتعرفوا ليه هما اتحولو لعالمانيين معتدلين بينفذوا اجندة اسلامية ترتكز على تطبيق اغلب مقاصد الشريعة دون تطبيق الشريعة

تعرفو ايه مقاصد الشريعة

هتكلم بشكل سريع لتذكيركم بمقاصد الشريعة

منع الضرر ورفعهِ وقطعهِ

حفظ الدين والنفس والعقل والنسل والمال

حفظ الدين مش باعلان الحرب على مخالفينك في الدين انما بالسماح لك بالتدين بعد ما كان ممنوع على المسلمة ارتداء ايشارب عادي جدا على راسها فسمح بالحجاب مرة اخرى في تركيا لكنهم مش بيكفرو لا اللي سايبة شعرها ولا اللي ماشية على حل شعرها

حفظ المال للافراد والدولة بحمايته من السرقة ومن التبديد

هما تركو كتير من الممارسات اللي تظهرهم بشكل احمق امام الحضارة الغربية يعني ادو الحرية لكل المواطنين زي الغرب تمام

مثلا لم يعلنو حرب على البغاء

عشان اللي مبتقولش لأ هتعمل كده حتى لو لبستها دولاب الهدوم كله

ولا اعلنوا حرب على الشذوذ تعرف ليه

عشان الشاذ لو حتى حبسته في سجن فبرضه هيتصرف ويريح الطرية حتى لو ببدنجان عروس او قتاية

يعني حربك على الحرية هو مجرد اجراء شكلي صحيح الممارسات المحرمة شرعيا دي هتستخبى لكن هتفضل موجوده يبقا معملتش حاجة غير انك انكرت وجودها مع انها موجودة

وبعدين بالمنطق كده كل انسان بيختار الحاجة الصح من وجهة نظره مظبوط ولا مش مظبوط

وطبيعي مفيش دكر زي حالاتي ولا حالاتك هيتعدي من واحد شاذ ويتحول لشاذ ,ده مستحيل طبعا اللهم الا اذا مكنش عندك ثقة في نفسك وخايف لا تبقا شاذ

لو اسلاميين تركيا لم يتعرضو لمعاناة شديدة كنت هتلاقيهم لحد النهاردة بيرددوا نفس الكلام اللي بيردده الاخوان

ولاحظ ان اسلاميين تركيا اتعلمنوا تماما بس بيناصرو قضايا الامة المصيرية

لاحظ موقفهم من فلسطين على سبيل المثال ووقوفهم في وجه امريكا واسرائيل دعما للقضية الفلسطينية

السؤال المهم دلوقتي يا ترى يا هلترى الاخوان لازم يتعرضوا لنفس ما تعرض له اسلاميين تركيا حتى يتغيروا ام سيتعلمون من تجارب الآخرين

على فكرة العالمانية مش شر العالمانية لو تبناها الاسلاميين هتكون لخير مصر وخير اكتر لقضايانا المصيرية

والسؤال اللي عارفك هتسأله طب ليه اخبي دقني وانا بزمر او ليه ابقا عالماني وانا اساسا اسلامي قح

الاجابة ببساطة مفيش حد هيسيبك تبني بلد وتحدثها طول ما انت عمال تبعبع وتهلفط وتهدد

عايز ترمي اسرائيل في البحر ما تقولشي كده والا هتبقا حنجوري زي ناصر , ولازم تعرف ان السياسي الشاطر لازم يتعلم يتكلم بحصافة وكياسة والا هيبقا كيس جوافة ومتنساش ان الصياعة ادب مش هز إزاز

عايز ترمي اسرائيل في البحر هترميها لما تبقا دولة عظمي واقتصادك قوي وشعبك عنده انتماء لأنك شبعته وعيشته في رفاهية فعشان كده هيبتكر ويخترع ويبدع ويستموت لصالح بلده وهينتج ويصنع بكفائه وضمير لصالح بلده

هترميها لما تنشأ بحث علمي وتبقا عندك صناعة حديثة ويبقا عندك جيش بيصنع سلاحه ويبقا عندك اكتفاء ذاتي في الزراعة والصناعة 

هترميها لما تصنع اول حاسوب مش تجمعه ولما تصنع اول طيارة وصاروخ فضاء مش تجمعهم او تشتريهم ولما تخترع منظومة صواريخ دفاع جوي لحماية سمائك من اي اعتداءات مش تشتري زبالة السلاح اللي بيستغنى عنها 

الغرب وبيبقا خلاص مالهاش لازمة الا للاستعراض على الشعب الجاهل بمواصفات هذه الاسلحة

عايز تحرر فلسطين مش بالهبهبه والبعبعه وعالقدس رايحين شهداء بالملايين

هتحرر فلسطين لما اسرائيل ومامتها امريكا يلاقوك عملاق ويخافو منك ويحترموك

انما هتعملي فيها شيخ المشايخ هتاخد على قفاك لحد ما تورم وتتحاصر ويتفرض عليك حظر تكنولوجي واقتصادي لحد ما تبقا صومالي افغاني مشترك

شغل مخك واتغير بسرعة عشان تلحق تضيق الفجوة قبل ما تتسع بيننا وبينهم

حاليا الفجوة العلمية والتكنولوجية تقدر بمائة عام وكل يوم بيمر بتتسع بشكل كبير

اتغير بسرعة ده لمصلحتك ولمصلحة بلدك ولمصلحة كل شئ نفسك تحققه على الارض ومتنساش ان الصياعة ادب مش هز إزاز

حسام عامر

كاتب ومفكر ثوري حر